الخميس اشتريت اول سيارة في حياتي بعد ان استغرقت قرابة الشهر في رحلة البحث عن سيارة و طبعا تامين مبلغ هذه السيارة اللتي لا اقول انها المنشودة و لكن اللتي ناسبت وضعي المالي الحالي طبعا الامر بدا بموضوع تقسيط مع سلفة 500 الف ليرة سورية و بعد البحث وجدت اغلب الشركات و البنوك اوقف التعامل مع التقسيط و وجدت شركة واحدة هي شركة اوبري تقسط و لكن بزيادة قدرها 400 الف عن سعر سيارة بمليون و مية الف هي الكيا سول اللتي كانت من خياراتي الاولى فاستبعدت الموضوع  نهائيا و حاولت البحث عن مستعمل مع اني بكره اركب مستعمل و لو شهر فكيف بسيارة مستعملة سعرها خمسمية الف يمكن تكون مستعملة عشر سنين او شئ سيارة صينية او ميني مستعمل من خمس ست سنين المهم الاهل ابدوا استعدادهم للمساعدة المالية  ففكرت بسيارة بمليون ليرة فوجدت ضالتي بالاكسنت ثم حولت للكيا سول بمليون و مية و قلت بتتدبر المية ثم حولت للسول كاملة بمليون و تلاتمية و قلت كمان بتتدبر و استقريت عالسول و على اساس اول الشهر التاني بيتامن المبلغ مع شوية ديون و دهب و هالمسائل و خلال هذه الفترة اللي سببتلي صداع رهيب و قلق من كتر ما بتسمع اراء مختلفة و شئ بقلك خود ريو البلد كتير عليه ريو و شوفيرة التكاسي اتضح انون حمير بموضوع السيارات و ما بيفهموا شئ و كلون بينصحوك كيا او هونداي مع اني الصراحة ببلاش ما بركب ريو الا للضرورة لانها طارشة كتير و فئة تانية بتقلك خود اقتصادي يعني لو موتور السيارة سلندر واحد و ما بيسع فيا الا الشوفير و الكيا سول مختلف عليها من حيث الشكل في ناس حبيتها و في ناس بتقول بشعة مشان هيك الشغلة بتوخد صراحة .
المهم قررت اطبق قاعدتي الذهبية في الشراء و اللي كتبت هالحكي كلو مشان اوصل هالقاعدة و اللي بتقول خود دائما شئ يناسب احتياجاتك انت و شوية شغلات مانك محتاجة بس بدك تتحتاجها عاجلا ام اجلا يعني شب بعمري بحب السيارة تكون فيها عنصر فخامة و تكون فيها تجهيزات رفاهية كفرش جلد و فتحة سقف و موتور السيارة طبعا يكون محترم و شئ كتير مهم عندي هو الامان لانو اذا وقع حادث فانت اهم عنصر لازم يكون بامان فتصور تكون بماتيز و تعمل حادث او تكون بمرسيدس و موضوع صرف البنزين معتمد على مشاويرك طبعا انا مشاويري قليلة و دائما الكل يحب الاقتصادي بس صعب تحقق كل شروط المعادلة المهم بالاخير في شركة رضيت تقسطلي مبلغ 250 الف لسنة و دفعت مليون و ميتين الف سلفة و اخدت شفروليه كروز كاملة موتور 1.6 فخامة بالنسبة لفئتها مو طارشة كتير امان عالي كماليات حلوة صريفة شوي بس  بتحس حالك راكب بالفعل سيارة امريكية من ناحية الثبات و الوزن و الفخامة و اخيرا لا انصحك بشراء كروز او غيرها و لكن شوف حاجاتك و مصراتك و الخيارات كتيرة ادامك المهم لا تهتم بكلام الناس لانو تفكير كل واحد مختلف عن الاخر بطريقة عجيبة و مبروك لك سلفا لانو اي سيارة بتاخدا في على الاقل الف واحد بيشاركك رائيك بهالبلد و هادا شئ بيكفيك و السلام.